超有趣手語廣角鏡--莉娜手語工作坊

【明報專訊】「齊心一意撐香港」、「穩中求變，迎難而上」、「競選已經結束，合作應該馬上開始」、「香港只有香港營」……呢啲語句係咪似曾相識呢？Emily唔係摷番特首梁振英（CY）競選期間嘅口頭禪，而係CY噚日嘅立法會發言，的確繼續重複番以上說話，難怪唔少議員都揶揄梁振英炒冷飯。CY成日被「盛讚」通曉「語言偽術」，睇完大家自己判斷喇。

CY噚日話，有部分人指新界東北發展係「赤化香港」、「割地賣港」，但認為呢啲言行唔代表多數港人，「但也不能掉以輕心，以為這些少數人的行為和言論對香港和內地關係的正常發展不會造成負面影響」。其實佢喺咪想講「呢班人會對中港發展造成負面影響」呢？

稱「赤化」言論不代表多數港人

此外，CY喺發言時亦用咗大量專業名詞，例如過去已經講咗好多萬次嘅「官產學研」同「G2G」，前者意指政府、產業界、學術同科研界別要更緊密合作，後者就指「Government to Government」，即係話特區政府要親自同中央政府解決CEPA遇到嘅問題，但市民真係未必知佢講乜。

CY談到保育時，又話香港「山高海深，氣候溫和，野生動植物種類繁多……」，之後又話「從太平山、獅子山、八仙嶺和鳳凰山俯瞰香港，我們看見香港繁華的一面……」，引來台下發笑。鄉議局主席劉皇發就笑言，CY完全唔提佢「主場」嘅屯門青山，就有啲失望喇。