超有趣手語廣角鏡--莉娜手語工作坊

「我仲未想做阿婆，叫我黎姑娘啦」。甫見面，黎麗霞這樣自我介紹。剛獲勞福局友善聘用獎，她是社企閃耀娛樂製作的創辦人。「得獎嘅唔係大型電訊公司就係公營機構，得我哋咁蚊型」。難怪她一面自豪，退休後迎來第二人生，62歲才創業，堅持不申請政府資助，只為訓練聾人搭建舞台，由民間自發創造就業。「頭一年最慘，無出過糧俾自己，但就試過信用卡透支出糧俾伙記」。走到人生下半場，剛夠資格兩蚊坐巴士的黎姑娘，繼續勇往直前不肯認老。　記者 呂麗嬋

 

週六早上，重建後的牛頭角上邨商場仍小貓三幾隻，黎姑娘與七個伙記已在開工。八個人，除了黎麗霞，清一色大隻男。「呢個行業，要搬音響又要set台，係勞動工作，不嬲男多女少」。蚊型社企，由設計、搭建舞台到接駁音響，甚麼都要一腳踢，黎姑娘打趣謂自己退休後的第二人生，辛苦過以前。「噚晚記協晚宴，完場成12點，拆番個台同啲佈景，搞得嚟都半夜，第二朝又要開工，有時喺球場，又要日曬雨淋」。

 

很辛苦，但她自言很喜歡衝衝衝的team work感覺。「最初要磨合，我嘅手語又唔好，唯有用筆寫，佢哋無點讀過書，寫又難，唯有俾多啲耐性溝通」。黎姑娘解釋。阿勇、一鳴，石波，都是聾啞人士。阿勇原本在酒店做清潔、一鳴送外賣，石波派報紙，都是基層工作，曾幾何時，他們仨都習慣打幾份工。「好似阿勇，之前除咗清潔，仲做埋倒垃圾」。生活艱難，16歲為養家老早輟學的她最明白

 

「佢做嘢係好心急，其實得個樣惡！」伙記阿勇在打手語，其他人哄堂大笑，難得站在一旁的黎姑娘絲豪不在意，笑作一團。「最初要請一批師父做，同一時間請一批聾啞伙記，一對一，等佢哋跟住學」。原本5個人的工作，她用上10個人，很傻，她說視作投資。「我俾佢哋一樣嘅人工，傷唔傷殘都好，人同此心，你唔出人工或只俾一半，會無咁有心機學」。薪酬支出雙倍，租車出糧又要付現金，黎直言頭一年不單自己無糧出，還要瞞着丈夫問銀行借錢。

 

「依家過咗唔怕講」。一味夠勇，她大笑。耳珠釘了兩個洞、染了一頭藍髮，頸和手都是藍色蝴蝶紋身，65歲的黎姑娘，又剛烈又潮。「老囉，不過我唔認！」嗓門大又感性，像勇武版「肥媽」，她自言可以好惡。「我會鬧人，試過叫個伙記即刻走，呢行一定要準時，話咗10點交場，遲5分鐘都係遲」。好在這行也靠口碑，用心總有回報。「唔好因為我哋請聾人做嘢，係社企先幫襯，我寧願你覺得係做得好…依家好多音響器材同架貨車，都係賺到錢逐樣買」。她說。

 

五兄弟姊妹排第二，開過時裝店、揸過保母車，停不下來的黎姑娘，謂做得最耐的其實是議員助理。80年代，工餘最大娛樂是做義工，由地區義工到互委會秘書，由唔識政治的師奶仔到助選智囊，親歷多場選戰，戰役有勝有負，做過涂謹申議辦總幹事，又加入過支聯會做常委。2010年自覺功成身退，她已想搞社企回饋社會。「做助理時成日幫手搞活動，要印橫額、搞活動又要砌吓舞台」。由外判到自己搞公司，2014閃耀正式成立，物換星移，這個非常師奶，路見不平性格未改。

 

「有次喺酒樓做嘢，中場休息坐喺後樓梯飲汽水，有個職員出嚟，叫佢哋小心唔好倒瀉，我企正隔籬，個職員講完佢哋聽唔到，竟然用隻腳踢，我好嬲，即刻投訴，搞到經理道歉先收科」。對伙記遲到零容忍，如因殘疾被欺凌，她第一時間同你死過。「大不了少做一單生意，我話如果佢哋係你屋企人，你會唔會咁對佢先？」讓友善聘用落地，65歲仍然熱血的黎姑娘反問。