港故事：我手寫我心　傳譯手語Connect聾人 @ 超有趣手語廣角鏡--莉娜手語工作坊

【明報專訊】噚日反修例民間記者會設即時手語傳譯，有啲公關睇到，話唔少大企業同政府都未必做到。原來背後係民間團體「基進報導」主動聯絡搞手提供傳譯。聾人傳譯員、聾人力量成員路駿怡（Connie）話，其實好多聾人唔係政治冷感，而係接收唔到資訊。「基進報導」負責人阿恆就話，希望證明畀政府睇，即時手語傳譯係絕對做得到嘅。

團體：聾人乏資訊非政治冷感

記者會上有兩個手語傳譯員，分別係胡歷恩（Kim）同Connie，健聽嘅Kim喺聽完發言後，會立刻做手語畀Connie睇。Kim話，因為手語始終唔係自己母語，自己聽完做一次，可能都會有用字不準確，而Connie就可以因應Kim所做嘅加以調整。

阿恆話，好多聾人好想參與呢個運動，奈何唔少聾人主要都靠睇電視接收資訊；而現場即時傳譯，同另外拍攝傳譯、喺另一框框播出有分別，即時傳譯電視台唔可以避開，香港新聞處間中提供手語傳譯嘅信號，可供電視台在畫面用另一框框播出，但電視台唔係每次都用。基進報導早排發布調查，133名受訪聾人中，48%唔知修訂《逃犯條例》狀態係「暫緩」，對比健聽者嘅認知落差好大。